Frå Republikken Sør-Afrika til Mundheim
Eit personleg møte med det fleirspråklege og fleirkulturelle
Sarifa Moola-Nernæs vil dela røynsler frå den kulturelle og språklege reisa ho har vore med på gjennom livet sitt.
Ho er fødd i Sør-Afrika, vaks opp under apartheidsystemet og deltok aktivt i motstandsrørsla der. Studiane førte henne til Storbritannia, der ho tok mastergrad i Fredsstudiar. Ho har doktorgrad i sosiolingvistikk frå universitet i Cape Town. I England møtte ho den norske bonden Peder Nernæs frå Mundheim, og enda opp som kone på garden hans ved Hardangerfjorden. Her bur ho no saman med ektemann og to døtrer.
No driv ho sitt eige konsulentfirma som har ulike tilbod innan sosialt entrepenørskap, coaching og konsulentarbeid innan antirasisme, inkludering og integrering. Sarifa brukar kompetansen sin i møte med innvandrarar som må omstilla seg sosialt, emosjonelt og kulturelt. I tillegg jobbar ho deltid på frivilligsentralen «Grannehjelpa», der ho leiar arbeidet med å skapa møteplassar og nettverk mellom nordmenn og innvandrarar. Språktrening og integrering heng nøye saman, seier Sarifa.
